企缸防水與試水

上手業主滲水落樓下有幾年之久,但係佢完全唔理樓下投訴,真係乜人都有!

今次同新業主裝修,一拆野樓下個苦主已經第一時間走上嚟叫我地做好.......做好..........做好防漏.

我地當然會做好,但係做好之後點樣先能夠令呢位苦主放心呢?

 我認為同佢講我地用乜材料點做點搞都係無用.

令佢放心嘅最佳方法就係比佢參與試水.

於是我就同樓下約時間,比佢睇住我地放滿水同落瑩光試水劑.

同佢講會儲水一星期,歡迎佢隨時上嚟睇下缸水.

放水當日亦會約埋樓下檢查清楚無漏水先會放水.

檢查放法好簡單,就係落樓下用支紫外光管照下有無綠色瑩光水印就得.

(我用手抺咗少少瑩光水落地,用肉眼係好難睇到濕咗,只要熄咗燈再照紫外燈就睇得好清楚)

因為呢棟係舊樓加上浴室一定有濕氣,如果單憑肉眼睇下有無水印,用手摩下有無濕氣去推測是否滲水係好武斷.

所以用燈照下成個天花,等苦主睇過無綠色瑩光水印咁就會放心.

當然自己單位都要照下有無滲漏啦.

蓄水一星期有多喇,放水日約咗樓下業主上嚟睇住我地放水,

放水前用水樽响企缸內入一支瑩光水做對照.

照個晒無漏水.

樓下個天花已經日久失修甩皮甩骨,

如果我唔用瑩光水做測試,個天花有無濕真係好難睇得清楚.

就算我好好眼力睇到真係無漏,但係樓下位太太信唔信我齋噏?

所以要用科學方法先可以事半功倍同埋令人信服.